10 чэрвеня, Мінск /Кар. БЕЛТА/. Аспекты развіцця ўнутранага турызму абмеркавалі беларускія тураператары на сустрэчы з галіновым рэгулятарам, паведамілі БЕЛТА ў Нацыянальным агенцтве па турызме.
Нацыянальнае агенцтва па турызме правяло рабочую сустрэчу з тураператарамі Беларусі, якія спецыялізуюцца на ўнутраным турыстычным рынку.
Аспекты развіцця ўнутранага турызму і павышэння якасці турыстычных паслуг у краіне сталі асноўнымі на парадку дня сустрэчы. Нарада арганізавана ў рамках рэалізацыі дзяржаўнай праграмы "Турызм" на 2026-2030 гады.
Дырэктар Нацыянальнага агенцтва па турызме Кірыл Машарскі азнаёміў прадстаўнікоў турыстычных фірм з новымі функцыямі нацагенцтва як галіновага рэгулятара. Тураператары таксама прадставілі свой погляд на ўнутраны турызм і яго тэндэнцыі. Размова ішла аб папулярных маршрутах, запатрабаваных фарматах падарожжаў і найбольш папулярных сярод беларусаў турпрадуктах.
Прадстаўнікі турбізнесу змаглі агучыць праблемы, з якімі сутыкаюцца пры фарміраванні і рэалізацыі тураў па Беларусі. Таксама на сустрэчы бакі абмеркавалі фарматы супрацоўніцтва, накіраваныя на папулярызацыю розных відаў турызму, маршрутаў арганізаваных падарожжаў і турыстычных аб'ектаў.
"Нацыянальнае агенцтва па турызме разглядае тураператараў як ключавых партнёраў у развіцці ўнутранага турызму. Па выніках сустрэчы выпрацаваны канкрэтныя крокі для сумеснай работы", - падкрэслілі ў нацыянальным агенцтве.-0-
