Аб парадку падачы і разгляду зваротаў

Парадак звароту
Звярнуцца ў Брэсцкі аблвыканкам можна некалькімі спосабамі:
• напісаць зварот і накіраваць яго на адрас: 224005, г. Брэст, вул. Леніна, 11;
• патэлефанаваць на прамую тэлефонную лінію, гарачую лінію;
• запісацца на асабісты прыём да кіраўніцтва аблвыканкама або да кіраўніцтва яго структурных падраздзяленняў;
• накіраваць электронны зварот, выкарыстоўваючы сэрвіс https://обращения.бел

Аб парадку падачы і разгляду зваротаў
Парадак падачы і разгляду зваротаў прадугледжаны Законам Рэспублікі Беларусь ад 18 ліпеня 2011 г. № 300-З «Аб зваротах грамадзян і юрыдычных асоб» (далей Закон).
1. Падача зваротаў.
У Брэсцкі аблвыканкам звароты падаюцца ў пісьмовай або электроннай форме, а таксама выкладаюцца ў вуснай форме.
Пісьмовыя звароты могуць быць пададзены нарачным (кур'ерам), накіраваны з дапамогай паштовай сувязі, пакінуты ў ходзе асабістага прыёму.
Электронныя звароты накіроўваюцца ў аблвыканкам з дапамогай дзяржаўнай адзінай (інтэграванай) рэспубліканскай інфармацыйнай сістэмы ўліку і апрацоўкі зваротаў грамадзян і юрыдычных асоб (обращения.бел).
Вусныя звароты выкладаюцца ў ходзе асабістага прыёму.
Важна! Звароты падаюцца ў арганізацыі, да кампетэнцыі якіх адносіцца вырашэнне пытанняў, выкладзеных у зваротах.
Арганізацыі, пры паступленні да іх пісьмовых зваротаў, што змяшчаюць пытанні, вырашэнне якіх не адносіцца да іх кампетэнцыі, на працягу пяці рабочых дзён накіроўваюць звароты для разгляду арганізацыям у адпаведнасці з іх кампетэнцыяй і паведамляюць заяўнікам у той жа тэрмін альбо ў той жа тэрмін у парадку, устаноўленым Законам, пакідаюць звароты без разгляду па сутнасці і паведамляюць аб гэтым заяўнікам з растлумачэннем, у якую арганізацыю і ў якім парадку трэба звярнуцца для вырашэння пытанняў, выкладзеных у зваротах.
Пісьмовыя звароты, у якіх абскарджваюцца судовыя пастановы, не пазней за пяць рабочых дзён вяртаюцца заяўнікам з растлумачэннем ім парадку абскарджання судовых пастаноў.
Звароты, якія змяшчаюць інфармацыю аб рыхтуемым, учыняемым або ўчыненым злачынстве ці іншым правапарушэнні, не пазней за пяць рабочых дзён накіроўваюцца арганізацыямі, у якія яны паступілі, у адпаведныя праваахоўныя або іншыя дзяржаўныя органы.

2. Тэрміны падачы зваротаў.
Падача заяўнікамі заяў і прапаноў тэрмінам не абмяжоўваецца.
Скаргі могуць быць пададзены заяўнікамі на працягу трох гадоў з дня, калі яны даведаліся ці павінны былі даведацца аб парушэнні іх правоў, свабод і (або) законных інтарэсаў. У выпадку, калі пазначаны тэрмін прапушчаны па ўважлівай прычыне (цяжкае захворванне, інваліднасць, працяглая камандзіроўка і інш.), наяўнасць якой пацверджана адпаведнымі дакументамі, прадстаўленымі заяўнікам, гэты тэрмін падлягае аднаўленню па рашэнні кіраўніцтва аблвыканкама, і скарга разглядаецца ў парадку, устаноўленым Законам.

3. Патрабаванні да зваротаў.
Звароты выкладаюцца на беларускай або рускай мове.

Пісьмовыя звароты грамадзян павінны змяшчаць:
назву і (або) адрас арганізацыі ці пасаду асобы, якая накіроўвае зварот;
прозвішча, уласнае імя, імя па бацьку (калі такое ёсць) альбо ініцыялы грамадзяніна, адрас яго месца жыхарства (месца знаходжання);
выкладанне сутнасці звароту;
асабісты подпіс грамадзяніна (грамадзян).

Пісьмовыя звароты юрыдычных асоб павінны змяшчаць:
назву і (або) адрас арганізацыі ці пасаду і (або) прозвішча, уласнае імя, імя па бацьку (калі такое ёсць) альбо ініцыялы асобы, якая накіроўвае зварот;
поўную назву юрыдычнай асобы і яе месца знаходжання;
выкладанне сутнасці звароту;
прозвішча, уласнае імя, імя па бацьку (калі такое ёсць) альбо ініцыялы кіраўніка ці асобы, упаўнаважанай ва ўстаноўленым парадку падпісваць звароты;
асабісты подпіс кіраўніка або асобы, упаўнаважанай ва ўстаноўленым парадку падпісваць звароты.

4. Калектыўныя звароты.
Калектыўны зварот – зварот двух і больш заяўнікаў па адным і тым жа пытанні (некалькіх пытаннях). Такое азначэнне даецца гэтаму паняццю ў Законе.
Згодна з агульным правілам калектыўны зварот разглядаецца ў тым жа парадку, у тыя ж тэрміны, што і індывідуальны зварот. Пры гэтым Законам устаноўлены асобныя асаблівасці. Так, калектыўныя звароты трыццаці і больш заяўнікаў у арганізацыі па пытаннях, што ўваходзяць у іх кампетэнцыю, падлягаюць разгляду з выездам на месца, калі іншае не вынікае з гэтых зваротаў.
Важна ведаць, што Законам устаноўлена дакладнае правіла для вызначэння адрасата адказу на калектыўны зварот. У выпадку, калі ў калектыўным звароце пазначаны заяўнік, якому неабходна накіраваць адказ, адказ на такі зварот накіроўваецца гэтаму заяўніку з просьбай праінфармаваць іншых заяўнікаў. У іншым выпадку адказ на калектыўны зварот накіроўваецца першаму ў спісе заяўніку, які пазначыў адрас свайго месца жыхарства (месца знаходжання), з просьбай праінфармаваць іншых заяўнікаў.

5. Разгляд зваротаў па сутнасці.
Пісьмовыя звароты лічацца разгледжанымі па сутнасці, калі разгледжаны ўсе выкладзеныя ў іх пытанні, прыняты належныя меры па абароне, забеспячэнні рэалізацыі, аднаўленні правоў, свабод і (або) законных інтарэсаў заяўнікаў і ім накіраваны пісьмовыя адказы.
Пісьмовыя адказы могуць не накіроўвацца заяўнікам, калі для вырашэння выкладзеных у зваротах пытанняў ажыццёўлены пэўныя дзеянні (выкананы работы, аказаны паслугі) у прысутнасці заяўнікаў.
Калі адказ па сутнасці пытання, выкладзенага ў звароце, не можа быць дадзены без прадастаўлення інфармацыі, распаўсюджванне і (або) прадастаўленне якой абмежавана, заяўніку накіроўваецца пісьмовы адказ з паведамленнем аб немагчымасці прадастаўлення яму такой інфармацыі.
Вусныя звароты лічацца разгледжанымі па сутнасці, калі разгледжаны ўсе выкладзеныя ў іх пытанні, прыняты належныя меры па абароне, забеспячэнні рэалізацыі, аднаўленні правоў, свабод і (або) законных інтарэсаў заяўнікаў і адказы аб'яўлены заяўнікам у ходзе асабістага прыёму, на якім выкладзены вусныя звароты.
Калі для вырашэння пытання, што выкладзена ў вусным звароце і адносіцца  да кампетэнцыі арганізацыі, у якой праводзіцца асабісты прыём, патрабуюцца дадатковае вывучэнне і праверка, зварот выкладаецца заяўнікам у пісьмовай форме і падлягае разгляду ў парадку, устаноўленым Законам для пісьмовых зваротаў.

Выпадкі, калі звароты прымаюцца да ведама і адказы на іх не даюцца:
у зваротах адсутнічаюць якія-небудзь рэкамендацыі, патрабаванні, хадайніцтвы, паведамленні аб парушэнні актаў заканадаўства, недахопах у рабоце арганізацый;
звароты змяшчаюць толькі падзякі;
звароты змяшчаюць просьбу заяўніка не накіроўваць адказ на зварот.

6. Пакіданне зваротаў без разгляду па сутнасці.
Пісьмовыя звароты могуць быць пакінуты без разгляду па сутнасці, калі:
звароты не адпавядаюць патрабаванням, устаноўленым пунктамі 1-6 артыкула 12 Закона;
звароты падлягаюць разгляду ў адпаведнасці з заканадаўствам аб канстытуцыйным судаводстве, грамадзянскім, грамадзянскім працэсуальным, гаспадарчым працэсуальным, крымінальна-працэсуальным заканадаўствам, заканадаўствам, што вызначае парадак адміністрацыйнага працэсу, заканадаўствам аб адміністрацыйных працэдурах, звароты з'яўляюцца зваротамі работніка да наймальніка або ў адпаведнасці з заканадаўчымі актамі ўстаноўлены іншы парадак падачы і разгляду такіх зваротаў;
звароты змяшчаюць пытанні, вырашэнне якіх не адносіцца да кампетэнцыі арганізацыі, у якую яны паступілі, у тым ліку калі заўвагі і (або) прапановы, унесеныя ў кнігу заўваг і прапаноў, не адносяцца да дзейнасці гэтай арганізацыі, індывідуальнага прадпрымальніка, не датычацца якасці рэалізуемых тавараў, выконваемых работ, аказваемых паслуг;
прапушчаны без уважлівай прычыны тэрмін падачы скаргі;
заяўнікам пададзены паўторны зварот, у тым ліку ўнесены ў кнігу заўваг і прапаноў, і ў ім не змяшчаюцца новыя абставіны, якія маюць значэнне для разгляду звароту па сутнасці;
з заяўнікам спынена перапіска па выкладзеных у звароце пытаннях;
звароты змяшчаюць пагрозы жыццю, здароўю і маёмасці, прымушэнне да ўчынення проціпраўнага дзеяння альбо заяўнік іншым спосабам злоўжывае правам на зварот.

Вусныя звароты могуць быць пакінуты без разгляду па сутнасці, калі:
не прад'яўлены дакументы, якія засведчваюць асобу заяўнікаў, іх прадстаўнікоў, а таксама дакументы, што пацвярджаюць паўнамоцтвы прадстаўнікоў заяўнікаў;
звароты змяшчаюць пытанні, вырашэнне якіх не адносіцца да кампетэнцыі арганізацыі, у якой праводзіцца асабісты прыём;
заяўніку ўжо быў дадзены вычарпальны адказ на пытанні, якія яго цікавяць, альбо перапіска з гэтым заяўнікам па такіх пытаннях была спынена;
заяўнік у час асабістага прыёму дапускае ўжыванне нецэнзурных альбо зневажальных слоў ці выразаў;
заяўнік прымяняе тэхнічныя сродкі (аўдыя- і відэазапіс, кіна- і фотаздымку) без згоды службовай асобы, якая праводзіць асабісты прыём, і адмаўляецца спыніць іх прымяненне;
звароты змяшчаюць пагрозы жыццю, здароўю і маёмасці, прымушэнне да ўчынення проціпраўнага дзеяння альбо заяўнік іншым спосабам злоўжывае правам на зварот.
Рашэнне аб пакіданні пісьмовага звароту без разгляду па сутнасці прымаюць кіраўнік арганізацыі, індывідуальны прадпрымальнік, да якіх паступіў зварот, або ўпаўнаважаная імі службовая асоба.

7. Тэрміны разгляду зваротаў.
Пісьмовыя звароты павінны быць разгледжаны не пазней за пятнаццаць дзён, а звароты, якія патрабуюць дадатковага вывучэння і праверкі, – не пазней за адзін месяц, калі іншы тэрмін не ўстаноўлены заканадаўчымі актамі.
У выпадку, калі для вырашэння выкладзеных у зваротах пытанняў неабходны ажыццяўленне пэўных дзеянняў (выкананне работ, аказанне паслуг), атрыманне інфармацыі з замежнай дзяржавы ў тэрміны, якія перавышаюць месячны тэрмін, заяўнікам у тэрмін не пазней за адзін месяц з дня, што ідзе за днём паступлення зваротаў, накіроўваецца пісьмовае паведамленне аб прычынах перавышэння месячнага тэрміну і тэрмінах ажыццяўлення такіх дзеянняў (выканання работ, аказання паслуг) або тэрмінах разгляду зваротаў па сутнасці.
Важна: Законам не ўстаноўлены абавязак інфармаваць заяўнікаў аб прадаўжэнні пятнаццацідзённага тэрміну разгляду звароту.

8. Расходы, звязаныя з разглядам зваротаў.
Звароты разглядаюцца без спагнання платы.
Расходы, панесеныя арганізацыямі, індывідуальнымі прадпрымальнікамі ў сувязі з разглядам сістэматычна накіроўваемых (тры і больш разы на працягу года) неабгрунтаваных зваротаў у адну і тую ж арганізацыю, да аднаго і таго ж індывідуальнага прадпрымальніка ад аднаго і таго ж заяўніка, а таксама зваротаў, якія змяшчаюць заведама непраўдзівыя звесткі (сумы, што падлягаюць выплаце экспертам і іншым спецыялістам, якія прыцягваюцца да разгляду зваротаў, паштовыя расходы, расходы, звязаныя з выездам на месца разгляду зваротаў, і іншыя расходы, за выключэннем аплаты рабочага часу работнікаў, якія разглядаюць звароты), могуць быць спагнаны з заяўнікаў у судовым парадку ў адпаведнасці з заканадаўствам.

9. Абскарджанне адказаў на звароты.
Парадак абскарджання адказаў на звароты рэгулюецца артыкулам 20 Закона.
Адказ арганізацыі на зварот або рашэнне аб пакіданні звароту без разгляду па сутнасці могуць быць абскарджаны ў вышэйстаячую арганізацыю.
Разгляд вышэйстаячай арганізацыяй скаргі па сутнасці ажыццяўляецца ў парадку і тэрміны, устаноўленыя Законам.
Адказ арганізацыі на зварот або рашэнне аб пакіданні звароту без разгляду па сутнасці пасля абскарджання ў вышэйстаячую арганізацыю могуць быць абскарджаны ў суд у парадку, устаноўленым заканадаўствам.
Адказ на зварот або рашэнне аб пакіданні звароту без разгляду па сутнасці арганізацыі, якая не мае вышэйстаячай арганізацыі, а таксама індывідуальнага прадпрымальніка могуць быць абскарджаны ў суд у парадку, устаноўленым заканадаўствам.

10. Парадак абскарджання адказаў Брэсцкага абласнога выканаўчага камітэта.
Адказ Брэсцкага аблвыканкама на зварот або рашэнне аб пакіданні звароту без разгляду па сутнасці ў адпаведнасці з артыкулам 20 Закона могуць быць абскарджаны заяўнікам у суд у парадку, устаноўленым заканадаўствам.