14 сакавіка, Мінск /Кар. БЕЛТА/. Атрыманне пашпарта - важнейшая падзея ў жыцці юнакоў і дзяўчат. Аб гэтым сказаў журналістам намеснік прэм'ер-міністра Ігар Петрышэнка ў час урачыстай цырымоніі ўручэння пашпартоў грамадзяніна Рэспублікі Беларусь, перадае карэспандэнт БЕЛТА.
Усебеларуская акцыя "Мы - грамадзяне Беларусі!", што стартавала 13 сакавіка, напярэдадні афіцыйнага свята Асноўнага закона дзяржавы, у Канстытуцыйным Судзе Рэспублікі Беларусь, прадаўжае эстафету па ўсёй краіне. Галоўнымі героямі ўрачыстай цырымоніі ўручэння пашпартоў у Рэспубліканскім доме моладзі сталі новыя паўнапраўныя грамадзяне краіны з усіх рэгіёнаў Беларусі і сталіцы. Свой першы галоўны дакумент і пуцёўку ў дарослае жыццё юнакі і дзяўчаты атрымалі ад намесніка прэм'ер-міністра Ігара Петрышэнкі і першага сакратара ЦК БРСМ Аляксандра Лук'янава. У падарунак юнакі і дзяўчаты традыцыйна атрымалі дзяржаўны сцяг і Канстытуцыю Рэспублікі Беларусь.
"Гэта мерапрыемства - важнейшая падзея для 14-гадовых хлопчыкаў і дзяўчынак. Яны атрымліваюць самы важны ў сваім жыцці дакумент - пашпарт, які ўвасабляе прыналежнасць да дзяржавы. Кожнае дзіця павінна адчуць, што ў яго ёсць не толькі правы, якімі яно павінна карыстацца, з'яўляючыся грамадзянінам нашай краіны, але і самае галоўнае - ёсць абавязкі, якія яно павінна ў поўнай меры, як гэта прадугледжана Канстытуцыяй і адпаведнымі законамі, рэалізоўваць і выконваць", - сказаў Ігар Петрышэнка.
Патрыятычная акцыя стартавала ў 2004 годзе па ініцыятыве Беларускага рэспубліканскага саюза моладзі. Толькі па лініі БРСМ у бягучым годзе адбудзецца каля 150 урачыстых уручэнняў з удзелам больш як 3 тыс. юнакоў і дзяўчат. "Такога гонару ўдастойваецца самая лепшая частка нашай моладзі - юнакі і дзяўчаты, якія добра вучацца, актывісты, спартсмены, пераможцы алімпіяд, а таксама рабяты, якія з'яўляюцца членамі БРСМ, яны заўсёды займаюць актыўную жыццёвую пазіцыю ва ўсіх сферах і задаюць тон нашай моладзі. Спадзяюся, гэта добрая традыцыя будзе прадаўжацца і ў далейшым. Думаю, гэта падзея напярэдадні Дня Канстытуцыі, які мы адзначаем 15 сакавіка, назаўсёды застанецца ў памяці хлопцаў і дзяўчат", - падкрэсліў ён.-0-
