11 мая, Мінск /Кар. БЕЛТА/. Праект закона "Аб дзяржаўнай рэгістрацыі і ліквідацыі (спыненні дзейнасці) суб'ектаў гаспадарання" адобраны Саветам Рэспублікі на пасяджэнні чацвёртай сесіі Савета Рэспублікі Нацыянальнага сходу восьмага склікання, перадае карэспандэнт БЕЛТА.
Каменціруючы журналістам законапраект, старшыня Пастаяннай камісіі Савета Рэспублікі па эканоміцы, бюджэце і фінансах Раман Бродаў адзначыў, што сёння на пасяджэнні Савета Рэспублікі разгледжаны адзін з сістэмных, фундаментальных законапраектаў у сферы эканамічных адносін. Ён вызначае як момант старту дзейнасці суб'екта гаспадарання любой юрыдычнай формы, так і працэс завяршэння яго работы, калі такое адбываецца.
"Адпаведна, узнікаюць абавязацельствы перад грамадствам, перад дзяржавай, перад людзьмі. Таму правілы ўваходжання ў гэту сістэму праваадносін вельмі важныя. Яны вызначаюць і ўмовы вядзення бізнесу: наколькі лёгка ў краіне пачаць бізнес, наколькі лёгка яго весці, суправаджаць і гэтак далей", - сказаў Раман Бродаў.
Над законапраектам працавалі больш за пяць гадоў, практычна ўсю мінулую пяцігодку, звярнуў увагу старшыня Пастаяннай камісіі. "Зроблена нямала. Прааналізаваны велізарны пласт міжнароднага вопыту: тое, як гэта адбываецца ў іншых краінах, што мы не ўлічылі на папярэдніх этапах. Вельмі важна, што мы вывучылі назапашаны вопыт у сферы адносін з суб'ектамі гаспадарання, - сказаў Раман Бродаў. - Не сакрэт, што ў некага ўзнікаюць патрэбнасці ў больш хуткіх працэдурах, нехта, на жаль, злоўжывае пэўнымі пралазамі норм заканадаўства і выкарыстоўвае гэта супраць грамадзян, супраць дзяржавы, у тым ліку не даплачваючы падаткі, магчыма, недзе маючы запазычанасць па заработнай плаце перад людзьмі".
Старшыня Пастаяннай камісіі адзначыў, што ўсе навацыі законапраекта можна ўмоўна падзяліць на тры вялікія блокі. Першы - рэгуляванне тых пытанняў, якіх не было да сённяшняга дня ў сістэме праваадносін. Другі блок - удасканаленне механізмаў, якія добра сябе зарэкамендавалі, але патрабуюць удакладнення, паляпшэння. Трэці блок - меры, накіраваныя на абарону грамадзян, інтарэсаў дзяржавы.
Раман Бродаў звярнуў увагу на такую навацыю, як увядзенне афіцыйнага статусу электроннай пошты, з дапамогай якой будзе ажыццяўляцца ўзаемадзеянне рэгіструючага органа і юрыдычнай асобы.
"З другога боку, дзяржава больш строга будзе наводзіць парадак па пытанні наяўнасці ў рэестры тых юрыдычных асоб, якія не ажыццяўляюць дзейнасць альбо падалі ўжо на ліквідацыю", - сказаў ён.
Акрамя таго, будуць устараняцца розныя злоўжыванні. Так, раней некаторыя юрыдычныя асобы маглі злоўжываць магчымасцю шматразовай падачы заяў аб ліквідацыі, тым самым прыпынялася выканаўчае вядзенне. "Мы ўстараняем пралазы ў сферы адносін, калі юрыдычная асоба магла закрыць, спыніць сваю дзейнасць, не выплаціўшы заработную плату, і пры гэтым зарэгістраваць новую. Цяпер такіх сітуацый больш не будзе", - сказаў ён.
"Асобна будзе весціся рэестр патрабаванняў крэдытораў, каб разумець, якія даўгі засталіся і з каго патрабаваць, калі яны ўзнікаюць на момант ліквідацыі", - дадаў ён.
У цэлым, паводле слоў старшыні Пастаяннай камісіі, законапраект вельмі пазітыўны і вельмі важны. Ён поўнасцю адпавядае патрабаванням кіраўніка дзяржавы аб выбудоўванні сучаснай, эфектыўнай і празрыстай сістэмы дзяржаўнай рэгістрацыі суб'ектаў гаспадарання.-0-
