24 красавіка, Брэст /Кар. БЕЛТА/. Мерапрыемствы акцыі "Бібліяноч-2026" пройдуць 24 красавіка ў Брэсцкай абласной бібліятэцы імя М.Горкага і Брэсцкай цэнтральнай гарадской бібліятэцы імя А.С.Пушкіна. Аб гэтым
паведамілі карэспандэнту БЕЛТА ў Брэсцкім аблвыканкаме.
У абласной бібліятэцы падзея пачнецца ў 18.00. Гасцей чакае насычаны вечар: лекцыі, гульні і дэгустацыя беларускіх страў на розных лакацыях. Наведвальнікі змогуць прыняць удзел у майстар-класах па вырабе кніжных закладак, паштовак і сувеніраў. Таксама чытачы пазнаёмяцца з гісторыяй развіцця кніг: якімі яны былі ў мінулым, якія прыстасаванні выкарыстоўвалі для іх стварэння, хто займаўся гэтым рамяством.
"Галоўная каштоўнасць любой буйной рэгіянальнай бібліятэкі - яе краязнаўчыя рэсурсы. Яны і стануць адметнасцю праграмы. На лакацыі "Краязнаўчы GPS" мы пакажам вінтажную тэхніку, якой карысталіся бібліятэкары іншых пакаленняў, калі працавалі з краязнаўчымі выданнямі", - расказала намеснік дырэктара па асноўнай дзейнасці бібліятэкі Ларыса Верамчук.
Цэнтральная гарадская бібліятэка імя А.С.Пушкіна будзе радаваць чытачоў на працягу дня сустрэчамі з дзіцячымі аўтарамі Марынай Бялясавай, Наталляй Кухліч і Таццянай Дземідовіч. А ўжо ў 18.00 у арт-прасторы ўстановы адкрыецца выстава жывапісу "Незвычайнасць звычайнага" ад удзельнікаў студыі "Пазітыў".-0-